وصفة السوفلي على طريقتي بزاااف ناجحة 🇩🇿: transcript

كنت بايتة عند العائلة الكريمة وجتهم على السوفلي على الزوج تاع الصباح. إيه وكما سمعتوا إحنايا نتعشاو على الزوج تاع الصباح على ثلاثة تاع الصباح عادي جدا لأنه في مصر هنا نرقدوا بعد الفجر. خصوصا بالنسبة للديار اللي يكونوا قدام البحر. المهم يعني نضت شمرت على يدي ودرت لهم واحد السوفلي ما عندي ما نحكي لكم في البنة. جا خرافة. شوفوا ما شاء الله كيفاش فارغ من الداخل. نجيبوا صحن اللي راح نخدموا فيه نحطوا فيه كأس ماء دافئ وكأس حليب دافئ، زوج مغارف تاع خميرة كبيرة وزوج مغارف تاع سكر. وقيس خمس مغارف تاع فرينة نحركوهم مليح ونخلوهم يخمروا مدة ربع ساعة. بعد ما خمروا حطيت عليهم نص كأس تاع زيت زيتون وشوية تاع ملح وزوج حبات تاع بيض. أنتم لو حبيتوا تديروا كمية أقل اقسموا الكونتيتي اللي درتها على زوج.

يعني استخدموا الكميات قسمة اثنين. نخلطوا مليح هذه المكونات ونبدأ نلموا فيهم بالفرينة حتى تكون عندنا عجينة طرية وفي نفس الوقت ما تكونش تتلاصق. وهنا لولو لازم تحط التاتش تاعها وتشارك في أي عجينة أنا نديرها. المهم هذا هو القوام المضبوط اللي نسحقوه. نروحوا نشعلوا الفور تاعنا على أقصى درجة. وهنا العجينة كانت تكونت لي 14 حبة تاع سوفلي. أهم حاجة بعد ما تقسموا العجينة تخلوها تزيد تخمر يعني الكريات هذوك يزيدوا يخمروا ومن بعد باش تبدأوا تفتحوا فيهم.

تفتحوهم رقاق وحطوا واش تحبوا الحشوة. أنا استخدمت تشكشوكة بصل وطماطيش و حطيت عليها موزاريلا. التون زدت حطيت لها زوج أنواع تاع فرماج كانوا موجودين عندي. أنتم حطوا واش تحبوا. زدت شوية زيتون. نغلقوا الحبة تاع السوفلي بهذا الشكل. ندهنوها بالبيض ونرشوها بالجلجلان ونحطوها في الفرن في الرف الأوسط. كي تحمار من تحتها نطفوا لها من تحتها ونفتحوا لها من فوقها. راح يدوا معاكم من ستة لعشرة دقائق في الطياب. ما راهمش راح يزيدوا على هكا. وشوفوا ما شاء الله غير ما تجبدوهم الشكل تاعهم كيفاش يكون. وغير ما تقسموهم كيفاش يكونوا فارغين من الداخل. وما شاء الله ماشي كامل ناشفين ومفرمجين وجاو بزاف بزاف هايلين.

عجبوهم كامل. وصدقوني هذه الوصفة تاع السوفلي راح تنجح حتى لو كنتوا أول مرة تجربوهم. الحمد لله اتعشينا وصلينا الفجر ورحنا رقدنا. وهذه هي كانت الوصفة تاعنا تاع اليوم. إذا عجبتكم ما تنسوش تشاركوها مع أحبابكم وتجربوها وتخلولي تطبيقاتكم وتعليقاتكم. وإلى اللقاء في فيديو جديد.